Magkahawak-kamay Tayo

Magkahawak-kamay tayong bumati
sa ragasa ng mga alon,
tumapak sa marurupok na kabibeng
nabiyak nang tahimik sa buhangin.

Magkahawak-kamay nating tinanaw
ang balangkas ng bundok sa malayo
samantalang gumagapang
ang kilabot ng lamig sa ating bisig—
hindi na natin pag-aalabin pa
sa matinding paghapit.
Mag-iingat lamang na hindi na muling
maging mabibigat na lubid
ang mga daliring magkakawing.

Magkahawak-kamay nating tatanawin
ang mga tala sa gabi, bubulong ng dalangin
nang malaktawan ang mga banging
laging nag-aabang sa ating pagkadupilas,
mga ngipin ng matutulis na bato
sa kailaliman handang-handang sumugat
sa ating hapong sakong sa munting pagkalingat.

Magkahawak-kamay na hindi aalagatain
ang pagkalanta ng kay raming rosas,
pagkalusaw ng bloke-blokeng tsokolate
sa bulsa at handbag sa nangakaraang
Araw ng mga Puso—at, sa halip,
mag-iingat sa pagtangan, paghaplos, pag-alalay
upang huwag nang magurlisan ang balat at laman
na umuurong, lumuluwag, lumalaylay
pinupuno ng katahimikan ang sari-saring kagamitan
sa bahay, na sa katagalan, siyang natututong
sa atin mangusap ng iisang litanya—

Maghawak-kamay sa umaga
Maghawak-kamay sa maghapon
Maghawak-kamay, ay, maghawak-kamay sa takipsilim
Tila kabibeng magkadaop-palad sa mga banal na lihim.

—Benilda Santos

2 Comments

  1. Hi Ems! Have you tried reading it aloud? Its whew! I don’t know if you can translate it in English, but you’ve got to try. Some words really sound cryptic. I think ‘banal na lihim’ means ‘holy mystery’ and I like what it conveys.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s